POSTS FROM SYMPHOSIUS'S RIDDLES
Jump to riddle:
25 26 27 28 29 30 31 32 33 34 35 36 37 38 39 40 41 42 43 44 45 46 47 48 49

Symphosius Riddle 25: Mus

Parva mihi domus est sed ianua semper aperta.
Exiguo sumptu furtiva vivo sagina.
Quod mihi nomen inest, Romae quoque consul habebat.

Click to show riddle solution?

Solution: Mouse
Symphosius Riddle 26: Grus

Littera sum caeli penna perscripta volanti,
Bella cruenta gerens volucri discrimine Martis;
Nec vereor pugnas, dum non sit longior hostis.

Click to show riddle solution?

Solution: Crane
Symphosius Riddle 27: Cornix

Vivo novem vitas, si me non Graecia fallit;
Atraque sum semper nullo conpulsa dolore;
Et non irascens ultro convitia dico.

Click to show riddle solution?

Solution: Crow
Symphosius Riddle 28: Vespertilio

Nox mihi dat nomen primo de tempore noctis.
Pluma mihi non est, cum sit mihi penna volantis;
Sed redeo in tenebris nec me committo diebus.

Click to show riddle solution?

Solution: Bat
Symphosius Riddle 29: Ericius

Plena domus spinis, parvi sed corporis hospes;
Incolumi dorso telis confixus acutis
Sustinet armatas segetes habitator inermis.

Click to show riddle solution?

Solution: Hedgehog
Symphosius Riddle 30: Peduculus

Est nova nostrarum cunctis captura ferarum,
Ut, si quid capias, id tu tibi ferre recuses
Et, quod non capias, tecum tamen ipse reportes.

Click to show riddle solution?

Solution: Louse
Symphosius Riddle 31: Phoenix

Vita mihi mors est; morior si coepero nasci.
Sed prius est fatum leti quam lucis origo.
Sic solus Manes ipsos mihi dico parentes.

Click to show riddle solution?

Solution: Phoenix
Symphosius Riddle 32: Taurus

Moechus eram regis, sed lignea membra sequebar.
Et Cilicum mons sum, sed mons sum nomine solo.
Et vehor in caelis et in ipsis ambulo terris.

Click to show riddle solution?

Solution: Bull
Symphosius Riddle 33: Lupus

Dentibus insanis ego sum, qui vinco bidentes,
Sanguineas praedas quaerens victusque cruentos;
Multaque cum rabie vocem quoque tollere possum.

Click to show riddle solution?

Solution: Wolf
Symphosius Riddle 34: Vulpes

Exiguum corpus sed cor mihi corpore maius.
Sum versuta dolis, arguto callida sensu;
Et fera sum sapiens, sapiens fera si qua vocatur.

Click to show riddle solution?

Solution: Fox
Symphosius Riddle 35: Capra

Alma Iovis nutrix, longo vestita capillo,
Culmina difficili peragrans super ardua gressu,
Custodi pecoris tremula respondeo lingua.

Click to show riddle solution?

Solution: Female Goat
Symphosius Riddle 36: Porcus

Setigerae matris fecunda natus in alvo,
Desuper ex alto virides expecto saginas,
Nomine numen habens, si littera prima periret.

Click to show riddle solution?

Solution: Pig
Symphosius Riddle 37: Mula

Dissimilis matri, patri diversa figura,
Confusi generis, generi non apta propago,
Ex aliis nascor, nec quisquam nascitur ex me.

Click to show riddle solution?

Solution: Mule
Symphosius Riddle 38: Tigris

A fluvio dicor, fluvius vel dicitur ex me.
Iunctaque sum vento, quae sum velocior ipso;
Et mihi dat ventus natos nec quaero maritum.

Click to show riddle solution?

Solution: Tiger
Symphosius Riddle 39: Centaurus

Quattuor insignis pedibus manibusque duabus
Dissimilis mihi sum, quia sum non unus et unus.
Et vehor et gradior, quia me mea corpora portant.

Click to show riddle solution?

Solution: Centaur
Symphosius Riddle 40: Papaver

Grande mihi caput est, intus sunt membra minuta;
Pes unus solus sed pes longissimus unus.
Et me somnus amat, proprio nec dormio somno.

Click to show riddle solution?

Solution: Poppy
Symphosius Riddle 41: Malva

Anseris esse pedes similes mihi, nolo negare.
Nec duo sunt tantum, sed plures ordine cernis;
Et tamen hos ipsos omnes ego porto supinos.

Click to show riddle solution?

Solution: Mallow
Symphosius Riddle 42: Beta

Tota vocor graece, sed non sum tota latine.
Pauperibus semper proponor namque tabernis.
In terra nascor, lympha lavor, ungor olivo.

Click to show riddle solution?

Solution: Beet
Symphosius Riddle 43: Cucurbita

Pendeo, dum nascor; rursus, dum pendeo, tumesco.
Pendens commoveor ventis et nutrior undis.
Pendula si non sim, non sum iam iamque futura.

Click to show riddle solution?

Solution: Gourd
Symphosius Riddle 44: Cepa

Mordeo mordentes, ultro non mordeo quemquam;
Sed sunt mordentem multi mordere parati:
Nemo timet morsum, dentes quia non habet ullos.

Click to show riddle solution?

Solution: Onion
Symphosius Riddle 45: Rosa

Purpura sum terrae, pulcro perfusa colore;
Saeptaque, ne violer, telis defendor acutis.
O felix, longo si possim vivere fato!

Click to show riddle solution?

Solution: Rose
Symphosius Riddle 46: Viola

Magna quidem non sum, sed inest mihi maxima virtus:
Spiritus est magnus, quamvis sim corpore parvo;
Nec mihi germen habet noxam nec culpa ruborem.

Click to show riddle solution?

Solution: Violet
Symphosius Riddle 47: Tus

Dulcis odor nemoris flamma fumoque fatigor,
Et placet hoc superis, medios quod mittor in ignes,
Cum mihi peccandi meritum natura negavit.

Click to show riddle solution?

Solution: Incense
Symphosius Riddle 48: Murra

De lacrimis et pro lacrimis mea coepit origo.
Ex oculis fluxi, sed nunc ex arbore nascor,
Laetus honor frondis, tristis sed imago doloris.

Click to show riddle solution?

Solution: Myrrh
Symphosius Riddle 49: Ebur

Dens ego sum magnus populis cognatus Eois;
Nunc ego per partes in corpora multa recessi;
Nec remanent vires, sed formae gratia mansit.

Click to show riddle solution?

Solution: Ivory